logo new

دليل الحرب الأهلية للمبتدئين

الحلقات مجمعة

حوش اللي وقع منك - أسئلة الحرب الأهلية للمبتدئين

شرارات

إيران- ٥ أجزاء

إيران   ٥- الأخيرة

 

إيران   ٤- الفكرة

 

إيران   ٣- الثورة

 

إيران  ٢- الحلزونة

 

إيران  ١- الشرارة

بيّنت يا فالح؟!

"في القدس تعريفُ الجمالِ مُثَمَّنُ الأضلاعِ أزرقُ،

فَوْقَهُ، يا دامَ عِزُّكَ، قُبَّةٌ ذَهَبِيَّةٌ،

تبدو برأيي، مثل مرآة محدبة ترى وجه السماء مُلَخَّصَاً فيها

تُدَلِّلُها وَتُدْنِيها

تُوَزِّعُها كَأَكْياسِ المعُونَةِ في الحِصَارِ لمستَحِقِّيها"

إتكلمنا قبل كده حوالي ربع ساعة للرد على حلقة عملها د يوسف زيدان في قناة تليفزيون مصرية

وردينا على إدعاؤه إن المسجد الأقصى الموجود في القدس ده مش هو المسجد الأقصى الحقيقي

وان موضوع الصراع العربي الصهيوني ما هو الا لعبة سياسية

تجار السلاح والسياسيين والمنتفعين من الحروب لبسوها لباس الدين

علشان يفضل الصراع مستمر ما يخلصش

و بعد ما حصل هجوم شديد على الدكتور من جهات كثير قرر إنه ينزل ما سماه هو تبيانات

وهم حوالي ٧ منشورات على الفيس بوك يشرح فيهم وجهة نظره بالتفصيل

إختفى منهم فى ظروف غامضة اثنين مش لاقيينهم للأسف لحد دلوقتى ومتبقي ٥

مش عارف هل الدكتور مسحهم والا حصل فيهم ايه

بس اختفوا مش لاقيينهم

والجديد دلوقتى ان الدكتور قرر إنه ينزل مجموعة مقالات لشرح التبيانات

اللي كان بيحاول يبين فيها رأيه اللي عرضه في التليفزيون

لما كان بيوضح فيه رأيه اللي قاله في أحد الندوات

والدكتور للأسف زي ما احنا شايفين كدة كل ما يقول حاجة ويلاقي الناس ردت عليها

يقول اصل انت ما فهمتوش وأنا هاوضح لكم

فيبدأ يوضح بكلام مالهوش علاقة بالموضوع أصلا

فالناس ترد على توضيحه

فيقول لا أصل انتم باين كده ما فهمتوش وأنا هابين لكم

فيبين بكلام زيادة مالهوش علاقة بالموضوع

فالناس ترد على تبياناته

فوصل فى النهاية انه هايكتب مقالات تفصيلية  في الموضوع

ناس كثير كانوا معترضين إننا نشغل وقتنا ونرد على كلام الدكتور

بس بعد اللي شافوه من تعليقات الناس على كلامه وعلى الفيديو اللي فات

إفتنعوا إن فيه مشكلة كبيرة حاصلة في وعي الناس

وإن ضروري إننا نرد على الهرس اللي بيهرسه الدكتور

 

بداية كدة صعب علينا اننا نلتزم بأننا ما نتريأش على كلام الدكتور

خصوصا لما يكون هو في كل مناسبة بيتريأ على المخالفين لرأيه

ومن أول منشور كتبه بيقول على المخالفين لرأيه إنهم حمقى

وتتوالى الشتيمة والسخرية مدعومة بكم غير طبيعي من الثقة في النفس وفي الهري اللي هو بيقوله

واللي إن شاء الله هانثبت خلال الربع ساعة اللى جاية دى انه هري محض

في رأيي إن السبب الأساسي إن الحوار إتحول لحوار العمي و الطرشان ده

إن فيه مشكلة كبيرة في مناقشة الدكتور يوسف ومن هم على شاكلته

المشكلة الأساسية إن مالهمش ماسكة

يعني مفيش ليهم  مرجع

أو حد كبير نرجع له

لأنهم شايفين نفسهم كبار قوي على إنهم يبقى ليهم مراجع

وكل ما تجيب له دليل هيشكك في صحة مصدر الدليل بتاعك

في حين إن هو من حقه يرمي كلام مرسل وينسبه للمؤرخين والعلماء والباحثين

اللي هم مين يا دكتور طيب علشان نرجع لهم

فستك

شفت ناس كثير بترد بالآيات والأحاديث على الهلك اللي الدكتور بيقوله

و المشكلة ان هايبقى رد الدكتور عليهم سهل جدا

أولا إنتم بتفسروا الآيات غلط

والأحاديث اللى انتوا جايبنها دي مش صحيحة

وبالتالي في ردنا هانعتمد أولا على المصادر نفسها اللي اقتبس منها الدكتور

وثانيا على المنطق بس

وأوقات كثير علشان نبعد عن الجدال بمصادر مختلف عليها

هانرد على بعض أسئلة الدكتور الاستنكارية بأسئلة أستنكر من أسئلة الدكتور

علشان نزود علامات الاستفهام عند حضراتكم

ويبقى كل واحد يرجع للمصدر اللي هو بيثق فيه علشان يلاقي الاجابة

فنبدأ بسم الله كدة  و أول تبيان ..

"ارفع ايدك و علي..ارفع ايدك و علي.."

التبيان الأول بيحكي عن مكر اليهود

وان بالرغم من ان مدينة القدس عدى عليها أعراق وديانات مختلفة

إلا إن اليهود بمكرهم  بيزعموا إنها بتاعتهم

وإنهم جم دلوقتى علشان يطهروها من الغوييم أو الأميين

تحقيقا لوعد الرب

والدكتور قال انهم بيعملوا كده بالرغم من ان وعد الرب المذكور في التوراة عندهم متحقق فعلا

لأن الوعد بيقول لنسلك يا إبراهيم أعطي هذا الأرض

وإسماعيل إبن إبراهيم هو أبو العرب

وإسحاق إبن إبراهبم هو أبو يعقوب المسمى بإسرائيل

فاللي موجودين على أرض دلوقتي سواء عرب أولاد إسماعيل أو يهود أولاد يعقوب هم من ولاد إبراهيم

بالإضافة لإن الدكتور أثبت إن بما أسماه الارتداد التاريخي

إن العرب المسلمين هم أطول من عاشوا على أرض فلسطين

كلام زي الفل لحد هنا

أثبت بيه الدكتور إن مزاعم الصهاينة لحقهم المطلق في الأرض مش مظبوطة

سواء كان الحق التاريخي أو الديني

وان حقهم الديني ده متفبرك لخدمة غرضهم السياسي وهو السيطرة على الأرض

زي ما …وهنا هنبدأ العك بقى

الحق الديني الإسلامي هو كمان متفبرك لخدمة السيطرة على الأرض

و إن اللي بيأجج الصراع ده هم الساسة وشركات السلاح والمنتفعين من الحروب والصراع

ومن العكة دي هنبدأ في التبيان الثاني

"من الأقصى تحية... من الأقصى تحية... من الأقصى تحية..من الأقصى تحية "

التبيان الثاني هو انكار فكرة  المعراج

وبيعمل فيه الدكتور حاجة الصراحة مبدعة جدا

وهي قياس الإسلام على الأديان والشرائع الثانية

مش بس الأديان و الشرائع  السماوية

ده بيقيس الإسلام على أديان وشرائع وثنية ومجوسية وبوذية

ببيقول الدكتور

إن الشرائع كلها بتقتبس شرعيتها وصلتها بالإله من حاجة من اثنين

إما عن طريق  التنزيل

يعني الإله نفسه أو الآلهة تتنزل بالرسالة

أو عن طريق التجسد أو إرسال ملك

أو وحي للرسول الموجود فى الأرض

زي ما حصل في اليهودية والمسيحية

أو عن طريق صعود الرسول نفسه  للسماء يتلقى الرسالة من فوق

زي ما حصل في ديانات فارس القديمة والهند

ولأن الدكتور شايف ان الاسلام والمسيحية واليهودية جوهرهم واحد

مع اختلاف الصيغ والتجليات

ففى رأي الدكتور ان الاسلام المفروض إنه زيه زي المسيحية واليهودية يكتفي بطابع التنزيل عن طريق سيدنا جبريل

و بيقول الدكتور ان عمرها ما حصلت فى أى ديانة من الديانات اللى قبل كده سواء بقى سماوية أو غير سماوية  ولا هو من المنطق ان يحصل الحاجتين الاثنين

التنزيل والمعراج

وبالتالي ده دليل إن المعراج ما حصلش !!!

 

بالرغم من إن الدكتور بيرفض الاحتجاج بالأحاديث في القضايا الخلافية  

وكمان بيشكك في الاحتجاج بالقرآن لأن العلماء بتوع الاسلام  في رأي الدكتور ما اشتغلوش كويس على فهم علوم القرآن

لكن هنا زي ماحنا شايفين بيستدل بديانات وملل ونحل ثانية وعايز يقيس الإسلام عليهم !!

وبيستخدم نصوص الديانات الثانية دي هم عن دينهم مش نصوصنا احنا عن دينهم ..

يعنى ايه؟

يعني احنا كمسلمين بنعتقد إن عيسى عليه السلام رفع للسماء ولم يصلب أو يقتل..

وأنه لا يزال حيا عكس اعتقاد المسيحيين ..

يعني عيسى عليه السلام أعرج به للسماء

لكن الدكتور تجاهل الحقيقة دي واعتمد على العقيدة المسيحية

ان المسيح عليه السلام  لم يعرج به للسماء حيا ..

هنقول ان الدكتور هيرجع يعتمد تانى على الدين الاسلامى

و هيحتج و يقول ان المسيح هنا رفعه كان في ظرف استثنائي

طيب ما هو معراج النبي صلى الله عليه وسلم كان ظرف استثنائي

النبي صلى الله عليه وسلم ما كانش بيعرج بيه كل يوم

ولا الرسالة كلها معتمدة على معراجه

وكانت رحلة الإسراء والمعراج بقدر ما نعلم انها للتسرية عن قلب النبي صلى الله عليه وسلم

بعد المعاناة بتاعت عام الحزن ورحلة الطائف اللي تم آذوه فيها …

 

وبعدين بيستدل الدكتور بدليل ثاني ان السورة اللي الناس بتدعي انها عن المعراج

ما إسمهاش المعراج .. إسمها النجم

لا يا شيخ !!

ما السور اللي بتتكلم عن غزوة بدر آل عمران والآنفال والحج والدخان و و و

ما فيش سورة منهم إسمها سورة  بدر

بالرغم ان غزوة بدر الكبرى دى  لها مكانة ممكن نقعد نتكلم فيها لحد الصبح

مافيش سورة واحدة فى القرآن متسمية باسمها

تسمية السور أساسا عليها خلاف هل هي توقيفية والا توفيقية

يعني فيه سور سماها النبي صلى الله عليه وسلم

وسور كانت باجتهاد الصحابة وممكن تلاقي لها أكثر من إسم

وفى بعض السور كان الصحابة بيسموها بأول كلمات منها

وتحديدا سورة النجم اتسمت بأسماء مختلفة نسبيا

يعنى اتسمت والنجم بالواو

واتسمت والنجم إذا هوى

و اتسمت سورة النجم

.. خلاصته ان ده مش دليل يحتج به

وبعدين دليله الثالث

ثم دنى فتدلى

ودي كلمات بمعنى النزول والهبوط مش الصعود

وزي ما وضحنا في الفيديو اللي فات ان رأي المفسرين زي الطبري اللي الدكتور نفسه  ناقل منه

إن الدنوهنا بمعنى الإقتراب

مش النزول

وان اللي دنى وتنزل ده كان جبريل اقترب من النبي صلى الله عليه وسلم

فدي حتى لو الدكتور هايشكك في الطبري

مش دليل قاطع حتى كمان إجتمع عليه العلماء

ده مجرد فهم الدكتور هو وتفسيره هو للكلمة

 

"بالروح بالدم نفديك يا أقصى...بالروح بالدم نفديك يا أقصى "

 

وندخل في التبيان الثالث

 

بيتكلم الدكتور عن مصادر التشريع بس مش عارف هو مسميها ايه كده

المهم إنه بيقول ان في الديانات السماوية فيه ٣ مستويات

مستوى النص الأول اللي هو في الاسلام الوحي

المستوى الثاني اللي هو الحديث أو السنة

والمستوى الثالث اللى هو أقوال الفقهاء

و فى الديانات التلاتة لا يجوز للمستوى الأدنى انه ينفى أو ينسخ المستوى الأعلى

وبناء عليه الدكتور شايف إن لو حصل نزاع سواء بين أتباع الدين الواحد

أو بين أتباع الأديان المختلفة

فالأفضل التمسك بالمستوى الأول

لأن في رأيه إن الأديان الثلاثة نفس الجوهر ولكن بتجليات مختلفة زي ما قلنا

وبالتالي فرأي الدكتور ان المستوى الأول هايقرب وجهات النظر بعيدا عن خناقات المستويات الأدنى

اللفة دي كلها ليه؟!

علشان في آية بتحكي عن الكفار وفيها الكفار بيقولوا للنبي صلى الله عليه وسلم

قَالُوا لَنْ نُؤْمِنَ لَكَ حَتَّى تَفْجُرَ لَنَا مِنَ الْأَرْضِ يَنْبُوعًا (90) أَوْ تَكُونَ لَكَ جَنَّةٌ مِنْ نَخِيلٍ وَعِنَبٍ فَتُفَجِّرَ الْأَنْهَارَ خِلَالَهَا تَفْجِيرًا (91) أَوْ تُسْقِطَ السَّمَاءَ كَمَا زَعَمْتَ عَلَيْنَا كِسَفًا أَوْ تَأْتِيَ بِاللَّهِ وَالْمَلَائِكَةِ قَبِيلًا (92) أَوْ يَكُونَ لَكَ بَيْتٌ مِنْ زُخْرُفٍ .  أَوْ تَرْقَى فِي السَّمَاءِ . وَلَنْ نُؤْمِنَ لِرُقِيِّكَ . حَتَّى تُنَزِّلَ عَلَيْنَا كِتَابًا نَقْرَؤُهُ . قُلْ سُبْحَانَ رَبِّي . هَلْ كُنْتُ إِلَّا بَشَرًا رَسُولًا (93)

 

بيقول الدكتور إن الكفار هنا طلبوا من النبي  صلى الله عليه وسلم أنه يعرج للسماء

والنبي قال لهم سبحان ربي هل كنت إلا بشرا رسولا

وبالتالي النبي هنا بينفي إن يكون في قدرته البشرية الصعود للسماء

فازاي القرآن ينفي

واحنا نقول ان الاحاديث بتثبت

القرآن المستوى الأعلى بينفي

والسنة المستوى الأقل بتقول عكس الكلام ده

إحنا هنمشي مع مين ؟

الأعلى القرآن ولا الأدنى اللى هي السنة

وبالتالي ما فيش معراج

هو السؤال اللي يتبادر لذهن الواحد هنا

هو مش ربنا فجر من الأرض ينبوع تحت أقدام الصالحين و الأنبيا ؟

وأعطى أنبياء ملك لا ينبغي لأحد من بعدهم

وجعل عاليها سافلها نصرة لدينه ولأنبياء ثانيين

وأرسل الملائكة على أقوام أنبياء

ورفع أنبياء للسماء زي سيدنا عيسى  و سيدنا إدريس

الحقيقة ان أصلا كفار قريش هنا كانوا بيعددوا معجزات أنبياء سابقين

اللي هم سمعوا عنها والنبي صلى الله عليه وسلم قالهم عليها وكان بيحذرهم من مصير الأمم السابقة بيها

فبيقولوا له بتحدي واستهزاء اعمل لنا زي اللى اتعمل معهم

طيب ليه قال لهم إنه بشر وما يقدرش

الشيخ الشعرواي له كلام كثيرهنا حلو في الموضوع ده

وغيره من المفسرين

أحيلكم له لان ده مش شغلى

بس اللي احنا عارفينه هنا على الأقل ان  بغض النظر عن الشيخ الشعرواي ولا غيره

إن فيه بشر أعرج بيهم للسماء

وذكر ده صراحه في القرآن عن سيدنا إدريس وسيدنا عيسى

وبالتالي يقينا قياس الدكتور هنا مش في محله

والموضوع زي ما اتفقنا محتاج حد بيفهم لغة عربية وفاهم سيرة وعارف سياق الأحداث علشان يفسره

وده مش باين خالص  انه منطبق على الدكتور زي ما هانشوف أكثر كمان  بعد كده

 

"يا قسام و يا حبيب اضرب اضرب تل ابيب..اضرب اضرب تل ابيب "

 

التبيان الرابع

 

و ده كله تأصيل لفكر القرآنيين بس بلطافة وظرافة وخفافة كده

يعني الدكتور بيقول إن الأحاديث مهمة جدا وكل حاجة

بس طول ما هي مش بتزعل حد مننا

لو  زعلت حد مننا .. لا خلاص بقى .. نبقى قرآنيين بس

والقرآنيين دول هم ببساطة اللي بينكروا الاعتماد على الأحاديث والإجماع والقياس كمصادر للتشريع

وفقط بيعتمدوا على القرآن

بس هو الدكتور يعنى رأيه مش خالص مالص قوي كده يعني

يعنى الدكتور بياخد من الحديث اللي مطابق للقرآن

ولو عدى عليه حاجة فيها كلام بفهمه هو للقرآن مش راكب على فهمه هو للحديث بيسيبه

يعني يسيب أحاديث البخاري ومسلم عن الإسراء و المعراج

علشان هو شايفها مش راكبة على فهمه هو للقرآن ..

وقعد يتكلم ان الاحاديث دى هى اللى فرقتنا عن بعض

السنة عن بعضهم والسنة عن الشيعة والمسلمين عن أصحاب الديانات السماوية

اللي هو شايف زى دايما ما بيقول ان جوهرها واحد لكن الفروق في التجليات

وكأن مشكلة السنة مع بعض مع الشيعة مع المسيحيين مع اليهود هاتتحل لو شيلنا الأحاديث خالص

و ان هي دي المشكلة الوحيدة اللي مانعة اننا  نبقى حووين وبنلعب مع بعض شطار و الكلام ده

منطق عجيب جدا الحقيقة

وقعد بعدها يرص شوية أسئلة جنب بعضها كدة مبنية على المبدأ ده ..

 

نقد مذهب القرآنيين موجود في كتب وفيه كلام كثير جدا لشيوخ كثير

وأكثر واحد بسط الموضوع ده بردو واتكلم فيه هو الشيخ الشعراوي الله يرحمه

وأنا يعني باحيل الناس للشعراوي لأن فيه شبه إجماع من عوام الشعب المصري على الأقل على الشيخ الشعراوى

بس يعنى سريعا علشان نفهم تبعات الفكر ده

ان احنا ممكن ببساطة نرد ونرفض كلام أئمة المذاهب كلهم بيه

لأنهم بيعتمدوا على الحديث وأقوال الصحابة في تفسير أحكام القرآن

وبيختلفوا مع بعض بناء على كدة

و بالتالى بقواعد الدكتور يبقى كلامهم مش حو

و الموضوع فيه كلام عقلي ونقلي كثير جدا محتاج شرح وتفصيل وده موجود ومتاح ومردود عليه من أيام الصحابة

و في النهاية بيسأل الدكتور سؤال عجيب جدا

بيقول ليه الكلام عن المعراج نشط بس وقت الخناقة بين عبد الله بن الزبير وبين الأمويين

وبعدها أيام الحروب الصليبية

وحديثا وقت الصراع بين المسلمين واليهود

هو مش ده يعتبر دليل  ان الصراع صراع سياسي ؟!

طب أنا هستأذنكم أحكيلكم أنا عملت ايه فى الحكاية دي

فيه مواقع مصنفة العلماء بالعصور اللي حضروها

فدخلت كتبت علماء القرن الأول الهجري

وبعدها القرن الثاني

وبعدها الثالث

وهكذا

واخترت عشاوئي بعدها كدة  كم اسم مشهور من كل عصر

وكتبت إسمه وكتبت بعده الاسراء والمعراج والمسجد الأقصى

ما لقيتش حد منهم الا واتكلم في الموضوع

بما فيهم العلماء اللي من قبل عبدالملك ابن مروان

والأدهى كمان علماء الدولة العباسية

اللي زي ما احنا عارفين  كانت بتمشي على كل اللي عملته الدولة الأموية بأستيكة

يعني لو افترضنا ان الدولة الأموية هي صاحبة خدعة المسجد الأقصى زي ما دكتور يوسف بيقول

و افترضنا ان كل علماء وشيوخ ومؤرخين الدولة الأموية مجرمين و باعوا ضميرهم ووالسوا مع الحكام

وكذبوا على المسلمين و فهموهم ان هو ده المسجد الأقصى

كان المفروض إن أول حاجة تعملها الدولة العباسية

اللي أبادت آلاف من بني أمية انها تفضح الموضوع ده

وتروح تهد المسجد الأقصى  و تطربقه و تساويه بالأرض

لكن الحقيقة اللي حصل هو  العكس تماما

وأول من رمم المسجد الأقصى بعد الأمويين كان أبو جعفر المنصور

ثاني خلفاء الدولة العباسية !!

بس هانسلم ان حساسات الدكتور رصدت نشاط زايد في الكلام عن المسجد الأقصى في الفترات دي

اقصد يعنى فترات الصراعات السياسية على القدس وفلسطين

هو مش ده طبيعي

كان حد بيتكلم عن تشبيه لطيف جدا ممكن نستخدمه هنا

ان الواحد ما بيبقاش حاسس بالنعمة ولا بيتكلم عنها الا لما يفقدها او يتهدد بفقدها

يعني مثلا الواحد ما بيحسش ان عنده كبد والا كلى ولا مصارين ولا بيتكلم عنهم

إلا لما بتمرض وتوجعه

فيبدأ يتكلم عنها كثير

فالموضوع ممكن نقول انه شبه كده

عندي خناقة على أحد المقدسات

فأكيد هانتكلم عن المقدس ده ونحكي عنه و نقول هو بيمثلنا ايه بشكل أكبر من الوقت العادي

أتمنى ان يكون الكلام ده كافي كرد على سؤال الدكتور اللى كان بيسأله ..

 

"تسلم يا وطنا...جنه جنه جنه..تسلم يا وطنا..."

 

ونشوف التبيان الخامس

فيه قصة سمعناها كلنا وكانت دليل على ذكاء النبي صلى الله عليه وسلم وثقة قريش فيه

وهي موضوع وضع الحجر الأسود في مكانه

وتحكيم النبي صلى الله عليه وسلم  بين بطون قريش في مين اللي يحط الحجر الأسود فى مكانه

السؤال اللي بنطرحه دلوقتي هو كان ايه اللي شال الحجر أصلا من مكانه؟!

الكعبة كبناء اتهدت واتبنت أكثر من مرة في عصور متعاقبة

منها المرة اللي عاصرها النبي صلى الله عليه وسلم  دي

وفي أغلب الظن ان سبقها مرات تانية

جه سيل شديد جدا دمر جزء  من الكعبة

وقريش ما بقتش عارفة تعمل ايه

هل ترممها وتكمل البناء ويبقى بناء ضعيف معتل مشوه

والا تهدها خالص وترجع تبنيها من جديد

وكان القرار هو الهد والبناء من جديد

طيب إيه ؟ مين اللي هايهدها

ده كان لسه حادثة الفيل ما عداش عليها وقت

كله كان خايف يقرب من الكعبة

لحد ما جه  الوليد بن المغيرة  الفدائى

و تطوع انه يعمل عملية فدائية ويبدأ هو في التكسير

و يبات ليلة

لو عدى الموضوع على خير دى تبقى اشارة من ربنا ان هو ده المطلوب فيكملوا الهدم في اليوم اللي بعده

باقي القصة لطيف قوي و يا ريت تقروها علشان تشوفوا تقدير قريش كان عامل ازاي للكعبة

المهم ان الموضوع عدى على خير

وكملوا الهدم

وجه وقت البنا

طيب ايه ؟! هانبني بيت الله الحرام بفلوسنا دى

ده إحنا فلوسنا كلها وساخة ومنيلة بستين نيلة

و راح  واحد منهم قال يا معشر قريش لا تدخلوا في بنياننها من كسبكم الا طيبا

لا يدخل فيها مهر بغي ولا بيع ربا ولا مظلمة أحد من الناس

فجمعوا الفلوس النظيفة طلعت كلام فاضي

لكن قرروا انهم يحافظوا على نظافة المال ويبنوا باللي جمعوه

فيادوب اللي جمعوه كفى يعملوا مبنى صغير كده على قده من طين

وما كفاش حتى إنه يكون على نفس مساحة الأرض اللي كان بنى عليها سيدنا إبراهيم الكعبة

والكعبة الأصلية كان حجر اسماعيل جزء منها   

ولما خلصوا البناء حصلت الحادثة اللي احنا عارفينها بتاعة وضع الحجر الأسود فى مكانه بمساعدة النبى عليه الصلاة و السلام

 

دي زي ما قلنا  ما كانتش أول مرة ولا آخر مرة الكعبة تتهد وتتبني أو تترمم

الشاهد هنا  إن المسجد مش بالبناء .. المسجد بالأرض المباركة الطيبة المبني عليها

والامتثال لأوامر ربنا سبحانه و تعالى  فيه

الترميم واعادة البناء زي ما قلنا تم أكثر من مرة

وفيه خلاف ان كان الترميم  بتاع الملك فهد الأخير ده تم فيه الهدم الكامل واعادة البناء والا لأ

ومن الآخر أغلب المباني الموجودة في الحرم المكي حاليا تاريخها ما يتعداش الثمانينات

 

نفس الوضع كان فى المسجد الأقصى

والحقيقة إن أغلب المباني المعروف تاريخها داخل المسجد الأقصى ما تعدتش عصر عمر بن الخطاب أساسا

ولكن المكان مكان مقدس بنا عليه سيدنا إبراهيم المسجد الأقصى بعد المسجد الحرام بأربعين سنة

زي ما أصح الروايات على حد علمنا بتقول

مش اللي بناه عمر بن الخطاب ابو قبة سودا ولا عبدالملك بن مروان ابو قبة دهبى ولا الوليد بن عبدالملك

ودي حكاية ثانية كنا اتكلمنا عنها قبل كده فى الفيديو اللى فات

المسجد الأقصى هو كل المساحة اللي داخل أسوار المسجد

و داخل الأسوار دي فيه مصليات و مساجد صغيرة كثير

المسجد القبلي اللي قبته سودا المشهور اللى الناس دلوقتى مسمياه المسجد الأقصى

وقبة الصخرة اللي قبته ذهبي

والمصلى المرواني

ومسجد النساء

و مسجد المغاربة

 

فيه مآذن كثير وفيه عمارة كثير جدا بناها حكام مختلفين على مدى العصور

كل العمارة و المبانى دي

داخل أسوار المسجد الأقصى

ما ينفعش ان احنا نسمي أي حاجة منهم لوحدها المسجد الأقصى حتى المسجد ابو قبة سودا زي ما كنا وضحنا قبل كدة

و نرجع للدكتور يوسف

في التبيان ده بيعمل حاجة غريبة والحقيقة عملها أكثر من مرة

إنه بيساومنا على الحقيقة

وده أسلوب غريب جدا ما يصحش انه يطلع من عالم

اللي هو ايه

أنا جاى انصحكوا ما تقولوش الحقيقة دي لأن لو قلتوها يبقى بتورطوا نفسكم

حضرتك إحنا بنقول الحقيقة بغض النظر عن العواقب

بيقولك انتوا كدة بتورطوا نفسكم انتوا بتقولوا ان المسجد مقدس من قبل الاسلام

انتوا كدة كأنكوا بتقولوا ان اليهود و اتباع الأديان السماوية كلهم ليهم حق فى المسجد ده

لا يا دكتور هانقول كده عادي جدا يعنى

وكون ان المسجد مقدس من قبل الإسلام مش بالضرورة دليل على تقديس كل الأديان السماوية السابقة له

يعني الحاجة المقدسة عند المسلمين حتى لو عمرها من قبل عمر الإسلام

فمش بالضرورة تكون مقدسة من أتباع الديانات السابقة

بدليل ان احنا حتى المسلمين أهه مش مجتمعين على تقديس مقدسات كتير

ولو كانت دي القاعدة فياريت يا دكتور تقول لنا ليه اليهود والمسيحيين مش بيقدسوا الكعبة كمان

بما إننا كمسلمين مؤمنين ان اللي بناها إبراهيم عليه السلام وهو من أنبياء العهد القديم

فبمنطق الدكتور كده يبقى المفروض كل الأديان اللى من بعد إبراهيم تكون بتقدس الكعبة بما فيهم المسيحية و اليهودية؟!

 

بس خلينا كمان نفترض ان فعلا المكان بتاع المسجد الأقصي ده تحديدا كان مكان مقدس عند اليهود

بالرغم من فشلهم هم ان هم يثبتوا ان هو ده مكان الهيكل بتاعهم

فتعالوا نتخيل ان أبو جهل وأبو لهب كتبوا تاريخ قريش في مكة

وحكوا عن الخير اللي كانوا بيعملوه

وعن عمارة المسجد الحرام وخدمة الحجيج وإعادة بناء الكعبة اللى قعدنا نحكى عنها دي

وحراستها من المجرمين اللي كانوا عايزين يهدوها

وحكوا عن الأصنام  اللي كانت في كل مكان في الحرم

والزوار اللى كانوا بييجوا من كل مكان و الكلام الجميل ده

تعالوا نتخيل إنهم كتبوا الكلام ده من ١٤٠٠ سنة

وجه ناس النهاردة من ألمانيا وأثيوبيا وروسيا وبولندا يقولوا إحنا أحفاد أبوجهل وأبو لهب

احنا من عباد اللات والعزى

وعايزين نسترد مكة ونبني أصنامنا من جديد

وجه واحد اسمه بيتيفور أمريكانى ادى  وعد للاتيين والعزيين بأرض الحجاز

و راحوا بعد شوية ساعدوا اللاتيين والعزيين على إغتصاب أرض الحجاز كلها بالسلاح

المفروض احنا ساعتها كمسلمين نعمل إيه ؟!

ده تقريبا مثال لكلام الدكتور اللى كان كاتبه عن تاريخ القدس

بيحاول يقول ان للصهاينة ليهم حق في القدس زي ما للفلسطينيين حق

وان خلينا فريش بقى كده ونبقى لطاف وكفاية دم ونشوف تسوية بقى مع الصهاينة من غير وجع دماغ و بهدلة

 

وختم الدكتور بزنقة عجيبة جدا زنق فيها نفسه

الدكتور بيقول إن في التاريخ المسيحيين كانوا بيعاندوا اليهود وبيرموا الزبالة في المكان اللي احنا بنقول عليه المسجد الأقصى

وربنا سبحانه و تعالى بيقول "سبحان الذي أسرى بعبده ليلا من المسجد الحرام إلى المسجد الأقصى الذي باركنا حوله "

فالدكتور بيسأل ..

إزاي ربنا يقول باركنا حوله

وفي نفس الوقت يسمح للمسيحيين انهم يرموا فيه زبالة ويوسخوه

وإنه بيقول ان مش ممكن هيكذب القرآن هنا ويصدقنا

وإن أكيد المكان اللي اترمت فيه الزبالة ده مش المسجد الأقصى

لأن ده بيتنافى مع معنى البركة على حسب فهم الدكتور لمعنى كلمة بركة

 

طيب معلش هو الدكتور كان بيقول ان المسجد الأقصى الحقيقي بتاعه فين ؟!

المسجد الأقصى الحقيقى بتاع الدكتور في الجعرانة على طريق الطائف المدينة

طيب ما تيجي نشوف ظروف المسجد والمنطقة اللي بتحكي عنها إنها المفروض هي المقصودة بالبركة دي إيه ؟

أي حد هيكتب على جوجل مسجد الجعرانة في الطائف

هايلاقي للأسف كلام عن كارثة بيئية في المسجد هناك

للأسف فيه طفح مجاري على الأرض

و الناس بتشتكى ان ريحة المجاري بتؤذي اهل المنطقة و  الزائرين للمسجد

وإن البئر التابعة للمسجد تم  قفلها لأن المجاري دخلت عليها وبقت غير صالحة للشرب

"و يوجد فى الجعرانة بئر قديمة قيل انها كانت شديدة العذوبة و لكنها قد اغلقت الآن بأمر من وزارة الصحة بسبب اختلاطها بمياه الصرف الصحى و عدم صلاحية مائها للاستخدام الآدمي"

فى رأيى كدة الدكتور قدامه حاجة من تلاتة

اما انه يقول إن ده كمان مش المسجد الأقصى ونروح بقى مع بعض ندورلنا على مسجد ثالث بما ان ده كدة  الحكاية بتاعته فكست

أو إنك تقول بقى من الأخر ان القرآن محرف من أساسه زي ما كنت بتلمح لما قد يفهم منه كده في حلقة التليفزيون

بكلامك عن كتاب الآيات الشيطانية بتاع سلمان رشدى

أو إنك تعترف إنك ما لكش في اللغة العربية ومش أهل لتفسير كتاب الله وإما انك تروح تدرس تفسير على أيد حد بيفهم  أوتروح تتفرغ للي بتفهم فيه أفيد لك وأفيد لنا ..

 

الحقيقة احنا فعلا معندناش وقت نضيعه اكتر من كدة مع الدكتور يوسف فى الموضوع ده

و هو وعد انه هيكتب شوية مقالات و احنا انتظرنا أول مقال

و أخرنا الحلقة دي لحد أول مقال ما يطلع لكن للأسف جه مخيب للأمال و لم يقدم أي جديد

و بالتالى بالنسبلنا احنا كدة الموضوع ده اتقفل بالثلاثة اقتراحات اللى اقترحناها على الدكتور

و اللى هننتظر فى مقالاته اللى جاية بعد كدة يمكن يكون فيه توضيح للكلام اللى احنا بنقوله ده

اللى شايف ان الفيديو ده مفيد يريت يشير و يعمل سابسكريب للتشانل و يعمل لايك لصفحة الفيسبوك

و اللى شايفه مش مفيد أسفين ان احنا ضيعنا وقت حضرتك

و شكرا جزيلا للناس اللى تابعت

و نراكم قريبا

و سلامه عليكم

"سسمع سمع كل الناس...احنا للأقصى حراس..احنا للأقصى حراس.."

Find the last offers by SkyBet at www.bettingy.com BettingY.com Bonuses

تابعونا على الحاجات دى

و إعملوا لايك و شير و سبسكرايب بالذوق

أحدث فيديوهات

Alshakhanah Alshangy

  • ألش خانة | إيران ج٥- الأخيرة
  • ألش خانة ع الهوا | الذكرى السنوية وإعلان هام
  • ألش خانة | ٥ سياسة || الرأسمالية

أحدث فيديوهات

Alsh5anah weekly ألش خانة الأسبوعي

  • ستوديو الألشخانة ٢ - ليه وزنك بيزيد في الصور ! (للمهتمين بالتصوير فقط!!!)
  • ألش خانة | على ما تفرج ٥١- وبعدين ؟
  • ألش خانة | على ما تفرج ٥٠- الأقصى

Built with HTML5 and CSS3 - Copyright © 2015 Alsh5ana