logo new

١٦- العصايا والجزرة


تحية كبيرة والله للناس اللي لسه بتأيد السيسي أنا بانبهر بالتميز الحقيقة في أى مجال حتى لو كان مجال أنا مش متفق معاه .. الصبر والمثابرة والمرونة ..  مش قصدي اللي كان بيحصل قدام الانتخابات
الواحد كان متخيل بعد خازوق البنزين ده هايهدوا شوية ويتكسفوا ويختفوا من وش الشعب وعلشان كده قلت الموضوع مش محتاج تعليق..
لكن ما شاء الله سماكة جلد تاريخية .. وطلعوا على الشعب بشوية كلام عن إن دي بداية خطوات الإصلاح الإقتصادي وإن دي إجراءات كانت لازم تتاخد من زمان وإن ده طعم الدوا المر وإننا المفروض نستحمل وكل ده هايروح بعد ما نخلص العلاج ..
كنا بدأنا من سنتين تقريبا نحكي عن عقيدة الصدمة وإزاي الشركات متعددة الجنسيات بتلعب بالشعوب وبتستغل الأزمات أو حتى بتفتعلها علشان تتدخل بسرعة تحت تأثير الصدمة دي وتعيد بناء نظام الدولة على نظام السوق الحر وإن نظام السوق الحر ده علشان يتطبق لازم شوية إجراءات أولها رفع الدعم بتاع الدولة عن كل سلع والخدمات يعني ما فيش دعم على الأكل والشرب والسكن والتعليم والمواصلات والصحة إلخ وخصخصة كل مرافق الدولة وبيعها للشركات متعددة الجنسيات دي اللي بتتنافس على شراها منافسة حرة.
كلمة السر في النظام ده هي المنافسة الحرة والاختيار الحرالشركات تتنافس على المستهلك من غير أي قيود والمستهلك يختار زي اللي هو عايز من غير ما حاجة تجبره إلا قدرته على الشراوالدولة ملزمة بس بسن القوانين اللي تضمن المنافسة الحرة دي ومراقبة تنفيذها  النظرية دي معتمدة على فكرة إن السوق الحر ده بيصلح نفسه بنفسه باليد الخفية وكل الصعوبات اللي بتحصل في البداية والمرمطة اللي بيشوفها الشعب والفقر والجوع ده هو الطعم المر للدوا اللي الاقتصاد محتاج ياخده علشان يخف ويبقى عال العال .. وده سبحان الله نفس الكلام اللي بيقولوه الإخوة الأفاضل المناضلين الداعمين لقبطان السفينة عبد الفتاح السيسيبعيدا عن ان النظرية دي أثبتت فشلها في كل الدول اللي حاولوا يطبقوها فيها
إبتداء من شيلي اللي حكينا عنها اللي الجنرال بينوشيه قائد الإنقلاب العسكري كان ماشي فيها في السكة دي لحد ما غرقها خالص وما قامش على رجله إلا لما رجع وأمم شركات كان خصخصها وغير كثير من خططه
ومرورا بالارجنتين اللي فيدالا سحلها على وشها وطلع منها محكوم عليه بمؤبد بسبب الخراب اللي جابه على البلد والجرايم اللي كان بيرتكبها علشان يخرس الشعب
وروسيا جورباتشوف وغيرهم وغيرهم كل اللي مشي في السكة دي فشل وهي دي السكة اللي بيبشرنا بيها الإخوة السياسوية الأفاضل العجيب بقى إن السيسي مش ماشي في السكة دي أساسا هو بيدوقنا المر بس من غير دوايعني المفروض رفع الدعم وانحسار دور الدولة من تقديم الخدمات يقابله تخفيض في الضرايب مش زيادتها وعمل انواع ضرايب جديدة !! مش تزود جمارك  ٣٦٤ سلعة وتصنفها سلع "استفزازية" ورفاهية!

يعني لو هاترفع الدعم وتخلينا نشتري الحاجة بثمنها الحقيقي يبقى شيل كمان الجمارك وخلينا نشتري بردو الحاجة بثمنها الحقيقيلو عملت حاجة من غير الثانية يبقى انت بتاخد إتاوة وجباية مش ضرايبوالمفروض طالما هاعمل سوق حر يبقى فيه شفافية بين الجهات المتنافسة في السوق ده مش يبقى فيه ثقب أسود إسمه المؤسسة العسكرية بزراعها الاقتصادي .. هو مش زراع بالظبط بس خلينا نقول زراع .. فوق المنافسة وفوق المراقبة وفوق المساءلة حتى ؟!! الفلوس بتدخل فيه بالأمر المباشر ما حدش عارف هي بتروح فين .. أو عارف بس هانكرإستثمار أجنبي إيه اللي هاييجي ينافس مؤسسة عندها عمالة أغلبها بالسخرة وأرض ببلاش وبيسند لها أعمال بالأمر المباشر وما فيش عليها رقابة مالية ولا بتنشر تقرير مالي واللي بيسأل عن الحاجات دي بيتنفخ .. ده شوية عيال عملوا فيديو بيدوقوا فيه كحك الجيش مسحوا لهم الفيديو ويقال انهم اتشدواأكبر عدو للسوق الحر هو تدخل الدولة والمؤسسة العسكرية مش بتتدخل وكأنها الدولة … لا دي بتتدخل بطريقة إله الإقتصاد عند قدماء المصريين !!
يعني ببساطة ووضوح الطريق اللي ماشي فيه المعلم طربقها طريق فاشل … وهو أصلا مش ماشي فيه عدلواتكلمنا قبل كده عن انه انه بيعمل كل حاجة وعكسها ومالوش مسكة ولا خطة ولا طريق في حلقة الأيديولوجية من خمسة سياسة
يعني الوعود بتاعة هاتشوفوا مصر والشعب لم يجد من يحنوا عليه وكل الكلام ده ما يتراحش من السكة دي والسكة دي أصلا إنت مكسرها .. هاتمشي فيها ازاي بس !!يا منجي من المهالك يا رب


"أرامل جيرسي" Jersey Widows أربع أرامل لأزواج ماتوا في أحداث 11 سبتمبر 2001 في أمريكا، وعايشين في ولاية "نيو جيرسي" New Jersey عملوا مجموعة ضغط علشان يطالبوا بقتح تحقيقات عن الفاعل الحقيقي وضم عليهم مجموعات ثانية من اهالي الضحاياتيجي سنة ٢٠٠٩ السيناتور الجمهوري جون جورنين أحد مجاذيب ترامب الحاليين واللي كان مرشح يمسك ال FBI في التغيير الأخير قدم مشروع قانون للكونجرس الأمريكي إسمه "قانون القصاص من رعاة الإرهاب" أو اختصاراً "جاستا" Justice Against Sponsors of Terrorism Act – JASTA،
بمقتضى القانون ده من حق أي مواطن أمريكي إنه يرفع قضية على أي "دولة"! في العالم يقدر يثبت إنها راعية للإرهاب، وياخد منها التعويض اللي يشوفه مناسب لحجم الضرر اللي حصل له بسبب العمليات الإرهابية دي.
طبعا مجموعة “أرامل جيرسي" وأمثالهم وجدوا في القانون ده ضالتهم وانطلقوا بقوة في الدعاية والترويج للقانون ده داخل المجتمع الأمريكي بفيديوهات مؤثرة بتفكر الناس بالبلاء العظيم اللي حل بيهم ونتايجه المستمرة لغاية وقتها في المجتمع الأمريكي.
القانون تم تفصيله بالمقاس على قد السعودية باعتبار إن أغلب المشاركين في العملية كانوا من السعودية وفيه معلومات هايعلن عنها بعد كده بتشير لتورط السفير السعودي في واشنطن في العمليةالممشكلة هنا إن ما ينفعش ما ينفعش تتم محاكمة دولة في محاكم محلية لدولة ثانية إلا لو الدولة دي وافقت وقالت انها مستعدة تخضع لقانون الدولة الأولانية عقيدة قانونية في القانون الدولي بيسموها Sovereign immunity أو المناعة السيادية وللسبب ده فضل القانون عليه جدل لحد ٢٠١٦ بدأت خناقة بين أوباما اللي كان رافض القانون والكونجرس اللي أقر القانون أوباما باعتبار ان تخصصه أصلا علاقات دولية شايف ان القانون بيكسر مبدأ راسخ في العلاقات الدولية اللي هو المناعة السياديةوالمبدأ ده تحديدا حامي أمريكا والكيان الصهيوني من بلاوي كثير
لو حصل و اتكسر مرة في أمريكا هاتمارس باقي الدول حقها في كسره وهاتبقى مصيبة على دماغهم وهايتشحططوا في المحاكمزائد ان السعودية لها استثمارات في أمريكا تعمل لها شي يجي تريليون إلا ربع تريليون دولار .. السعودية بعتت وزير خارجيتها يوصل رسالة واضحة وصريحة للأمريكان في واشنطن إن لو القانون ده تم تمريره فال ٧٥٠ مليار دولار هايتم تسييلهم وسحبهم من السوق الأمريكي ونراكم في نهاية النفق ..طبعا تهديد كوميدي لأن زي ما بيقولوا برة if the shit hit the fan أو يعني لو البيبي خبط في المروحة ال ٧٥٠ مليار دول  بقانون جستا ممكن يتجمدوا بالصلاة عالنبيبس ده هيبقى ليفيل عالي من التصعيد المهم أهه بيهددفي المقابل الكونجرس شايف ان احنا أمريكا وهانجيب حقنا من عين التخين والإعلام سخن الدنيا سبتمبر ٢٠١٦ كان عرض القانون على الكونجرس في جولة جديدةحاولت السعودية في الأول إنها تستخدم ٩ شركات علاقات عامة صرفت عليهم ٨ واربعة من عشرة مليون دولار علشان يحاولوا يقنعوا أعضاء الكونجرس برفض القانون لكنهم فشلوا وطاروا ال ٨ أنارب
وتحت الضغط الإعلامي والمظاهرات وافق الكونجرس على القانونلكن أوباما إستخدم الفيتو الرئاسي واعترض عليه وأصبح القانون محتاج موافقة ثلثين البرلمان علشان يتجاوز فيتو الرئيس وقد كان والنتيجة كانت 97 صوت مؤيد للقانون مقابل صوت واحد رافض في مجلس الشيوخ، و348 صوت مؤيد قصاد 77 رافض في مجلس النواب وهنا سقطت لويزازاي حصل الكلام ده كل دول معارضين لكلام الرئيس اللي هو أصلا خبير في العلاقات الدولية أكاديمياوالمفروض انه راجل فهماناللي قلب الترابيزة كان الإفصاح عن "28 صفحة" كانوا مخفيينطول ال 14 سنة من ديسمبر 2002 لغاية يوليو 2016، ال٢٨ صفحة دول كانوا جزء من تقرير التحقيقات اللي استمرت من ١١/٢٠٠١ لحد ١٢/٢٠٠٢كان تقرير عبارة عن ٨٣٨ صفحة مختفي منهم ال ٢٨ دول وكانوا الناس عارفين انهم مختفين لمصلحة سياسيةال٢٨ صفحة العجيبين دول كان فيهم كلام عن علاقة الحكومة السعودية المباشرة ب٩/١١واتصال بين السفير السعودي وبين واحد اسمه أبوزبيدة اللي قالوا انه مدير عمليات القاعدة وتحويل فلوس ودرمغة ودلوقتي فيه كلام ان لا زبيدة ولا أبوها لهم علاقة بالقاعدة أساسا وان الراجل مرمي لحد دلوقتي في جوانتانامو بدون محاكمة .
المهم ان التقرير بيقول ان السفير كان بيلاغي أبو زبيدة بعدها سفير السعودية في بلجيكا ولكسمبرج ومبعوث السعودية للاتحاد الأوروبي السفير عبدالرحمن الأحمد قال ان يعني محتاجين نسأل نفسنا إن كنا عايزين نفتح موضوع زي ده ونهدد إستقرار التحالف الدولي ضد الإرهاب وقال أنا واثق ان الكونجرس هاياخد الخطوات الضرورية انه يظبط القانون لتفادي أي تبعات ممكن تحصل.الجملة شكلها بالعربي سخيف وبالانجليزي أسخف وكأنه بيقول لهم يعني مش وقت الموضوع ده دلوقتي إنتم حاليا محتاجين لنا خليه لبعدين لما تخلصوا حاجتكم مننا ابقوا ارمونا وقولوا علينا إرهابيين .. الوضع دلوقتي إن القانون تمت الموافقة عليه وبدأ التطبيق في مقاطعة كولومبيا أرملة ضابط اتقتل في البنتاجون في ١١ سبتمبر بتتهم السعودية بمساعدة أسامة بن لادن والقاعدة ماديا وتم ارسال استدعاء للمتهم اللي هو المملكة العربية السعودية لوزارة الخارجية في الرياضوقضية ثانية في الطريق .. المرة دي في نيويورك .. طالبين فيها تعويض ٢٠ مليون دولار من السعودية وفيه أكتر من سبع قضايا من ضحايا 11 سبتمبر مرفوعة ضد المملكة في المحاكم الفيدرالية الأمريكية، منهم واحدة اترفعت في مارس 2017 بتضم عائلات 800 قتيل و١٥٠٠ مصاب في الهجمات، القضايا دي قضايا تعويضات أقل رقم تقديري لمجموع التعويضات فيهم كان 30 مليار دولار
الشئ المذري إن القانون لسه مش باين له راس من رجلين يعني بالرغم من انه اتوافق عليه مش باين مين اللي هاينفذه وازاي وايه العقوبات بالظبط حاجة كده كأنك ماسك حرامي غسيل وبعد ما حققت معاه قلت له اترمي هنا لما أفكر هاعمل فيك ايه
المزنق هنا إن الضربة دي جاية والسعودية تحت قصف المنظمات الحقوقية بسبب الحرب في اليمنمنظمات حقوقية زي "هيومان رايتس واتش"في تقريرها لعام 2016 اتهمت المملكة اتهامات تصل لجرائم حرب في "اليمن" وقتل 800 مدني رجالة ونساء وأطفال في أكثر من 58 غارة طيران غير شرعية مستهدفةً لبيوت ومستشفيات وأسواق ومدارس بأسلحة محرمة دولياً وفقاً لتوصيف تقرير المنظمة.و“الأمم المتحدة” حطت السعودية على "القائمة السوداء لقاتلي الأطفال في العالم لعام 2016"، و اسم المملكة بعد كده اترفع بعد ضغط عنيف على مكتب "بان كي مون" شخصياً وهددوهم بإنهم هيبطلوا يدفعوا دعم مالي لمنظمة الأمم المتحدة في حال بقاؤهم على القائمة المشينة دي.
وبين عصاية الجستا وجرايم الحرب وجزرة دعم بن سلمان بتتشكل العلاقات بين الولايات المتحدة والسعوديةتهديد وتلويح بالجستا وإتهام بالإرهابيعملوا له مهرجان الرياض لدفع الجزيةفتبقى السعودية أول دولة يزورها ترامب بعد ما تولى الرئاسة ويعملوا منها كرنفال البلورة المسحورة لمكافحة الإرهاب يا ولا .. دي السعودية يا ولا اللي قلت عليهم إرهابيين وكنت بتشتم أوباما لما استخدم الفيتو ضد قانون هايدينها ..لا خلاص .. برافو يا حمادة .. إحنا ما عندناش مانع تبقى ملك بس لو الشيطان لعب بعقلك وقال لك تتأخر في دفع الجزية أو تستهبل مع ولاد عمك الصهاينة الجستا موجود أهه !!
تميم:
لَنَا مُلُوكٌ بِلا دِينٍ إذا عَبَرُوا *** فِي جَنَّةٍ أَصْبَحَتْ مِنْ شؤمهم جَرَدَا
أَنْيَابُهُمْ فِي ذَوِي الأَرْحَامِ نَاشِبَةٌ *** وَلِلأَعَادِي اْبْتِسَامٌ يُظْهِرُ الدَّرَدَا
لا يَغْضَبُونَ وَلا يُحْمَى لَهُمْ حَرَمٌ *** وَإِنْ تَكُنْ دُونَهُمْ أَسْيَافُهُمْ نَضَدَا
وَيَسْتَلِذُّونَ تَعْذِيبَ الغُزَاةِ لَهُمْ *** إِنَّ المُحِبَّ يَرَى فِي ذُلِّه رَغَدَا

١٥- قانون الطوارئ

في ٩ إبريل ٢٠١٧ وبعد حوادث تفجيرات كنايس في طنطا والاسكندرية، أعلن السيسي حالة الطوارئ في البلاد.. طب وإيه الجديد؟! بلد عاشت ٣٠ سنة مع مبارك في طوارئ..هتفرق كتير؟ نشوف!
حلقة للإجابة على أسئلة كتير عن قانون الطوارئ:
يعني إيه قانون طوارئ؟ ومين المسؤول عن إعلانه ومين المفروض يوافق؟
إيه حقوقك كمواطن في الحالة العادية وبتتأثر إزاي في حالة الطوارئ؟
هو إحنا في مصر محتاجين طوارئ؟ مين المستفيد؟

 

يوم 9 ابريل وبعد تفجير الكنيستين بتوع طنطا وإسكندرية اللي راح ضحيتهم 45 قتيل و 120 مصاب،اجتمع السيسي بمجلس الدفاع الوطني في يومها و قرروا: إعلان حالة الطوارئ مع شوية إجراءات تانيه كده… وخلينا نركز في حالة الطوارئ

1. يعني ايه حالة الطوارئ؟
إجراءات إستثنائية  بتاخدها الدولة في حالة الكوارث الطبيعية او الحروب او الإضطرابات اللي ممكن تعرض حياة المواطنين للخطر --- واخد بالك من إستثنائية دي؟؟؟ اهو مبارك كان شايف ال30 سنة اللي حكمهم إستثنائيين!!!
وعلشان نقول يعني ايه إستثنائي لازم الاول نشرح ايه الوضع الطبيعي و ايه حقوقك اللي بيكفلهالك الدستور؟
◦ اول حق لك - هو حق الخصوصية
الشرطة مينفعش تتصنت او تفتش تليفونك او facebook او تقتحم بيتك غير بعد ماتعمل تحريات و تاخد إذن  من النيابة
◦ تاني حق لك - هو حرية التنقل و حظر التهجير القسري  إلا بأمر قضائي
◦ تالت حق - هو حقوق المتهم: في الحالات العادية (مش طوارئ) لو الشرطة وهى بتعمل تحريتها اكتشفت انك مجرم وجمعت الأدلة على كده، هل ينفع انهم يركبوا البوكس و يجولك البيت و يقبضوا عليك و يحطوك في السجن؟ لأ!!!  لازم الشرطة تاخد إذن النيابة عشان تقبض على المتهم لو مش قافشينه في حالة تلبس…. و ايه كمان
"ولازم تتعرض على النيابة خلال 24 ساعة عشان يتحقق معاك
مش تفضل مرمي بالشهور و السنين و انت مش عارف مقبوض عليك ليه او ما اتحققش معك…
طيب لو النيابة حققت معك و لسه شايفينك مجرم و عايزين يجمعوا ادلة تاني…. من حقهم يحبسوك إحتياطي…. مدى الحياة؟؟؟ لا طبعا فيه قانون بيحكم الموضوع ده
قبل الانقلاب كان قانون الحبس الاحتياطي بيقول:
لايجوز أن تتجاوز مدة الحبس الاحتياطي ستة أشهر في الجنح وثمانية عشر شهرا في الجنايات وسنتين إذا كانت العقوبة المقررة للجريمة اللي محبوس المتهم إحتياطي على ذمتها هي السجن المؤبد أو الإعدام."
بس عدلي طرطور في سبتمبر 2013 بعد فض اعتصام رابعة و بداية القبض على أي حد في الشارع  عدلوا الفقرة بتاعة السنتين و خلوها عالمفتوح مدى الحياة للمتهمين بعقوبة تصل للاعدام او المؤبد… و ده كان طبعا متفصل على الاخوان و المتعاطفين لان بما انهم ارهابيين فأكيد حياخدوا اعدام او مؤبد… فالقانون ده فتحهلهم عالبحري في موضوع الحبس الاحتياطي
• رابع حق  - هو التقاضي على درجتين:
لو خلاص جمعوا الادلة و اكتشفوا بالادلة انك مجرم… يروحوا محولينك لمحكمة الدرجة الاولى او الابتدائية...القاضي يا إما يبرأك و تطلع تروح بيتكم او يحكم عليك انك مذنب و يتحكم عليك …
لو اتحكم عليك و انت شايف انه حكم مش عادل ممكن تعمل إستئناف يعني تطلب من محكمة اعلى انها تنظر في قضيتك و كل دي ضمانات لشموخ القضاء و تحقيق العدالة
4. الحقوق المسلوبة من الطوارئ؟ - عكس كل الحقوق اللي قلناها من شوية…

قانون الطوارئ ادى الحق في:
◦ القبض على المشتبه فيهم أو الخطرين على الأمن والنظام العام دون التقيد بأحكام قانون الإجراءات الجنائي يعني مش محتاج يعمل تحريات وياخد إذن نيابة
◦ الترخيص في تفتيش الأشخاص والأماكن دون التقيد بأحكام قانون الإجراءات الجنائية
◦ مراقبة الرسائل أيا كان نوعها ومراقبة الصحف والنشرات والمطبوعات والمحررات والرسوم وكافة وسائل التعبير والدعاية والإعلان قبل نشرها وضبطها ومصادرتها وإغلاق أماكن طباعته
◦ وضع قيود على حرية الأشخاص في الاجتماع والإنتقال والإقامة والمرور في أماكن أو أوقات معينة
◦ إخلاء بعض المناطق أو عزلها وتنظيم وسائل النقل وحصر المواصلات وتحديدها بين المناطق المختلفة
يعني الشرطة دلوقتي معليهاش اي قيود ومش محتاجة تاخد اذن النيابة في اي حاجة… عايز يفتشك يفتشك، عايز يقبض عليك من غير اي ادلة او اذن براحته!
طيب اتقبض عليك بالاشتباه… ايه اللي هايحصل؟  
من حق الرئيس تشكيل محاكم أمن الدولة العليا- طوارئ و تعيين أعضاء المحكمة
مش بس كده… ده كمان ممكن يعين ضباط بدل القضاة في محاكم امن الدولة
يعني مش حنحيلك للقضاء العسكري… داحنا نجبلك الضباط لحد المحكمة وفي تاكس !
و الثقيلة بقى ان  أحكام محاكم امن الدولة العليا دي نافذة و لا تخضع لإجراءات النقض… يعني بالصلاة على النبي كده مفيش حاجة اسمها تظلم و استئناف…. على المشنقة عدل!
5. كيفية إعلان الطوارئ (دستورياََ)
من ساعة اغتيال السادات في سنة 1981، مبارك أعلن حالة الطوارئ عشان نقبض على المخططين لقتل الرئيس السابق و كده…. و وعد القوى السياسية ان كلها سنة سنتين بس يستقر الوضع و نلغي حالة الطوارئ… الدستور القديم كان بيلزم الرئيس اخذ موافقة أغلبية مجلس الشعب كل سنتين لتجديد الطوارئ… و طبعا بصمجية الحزب الوطني موافقون موافقة وفضلوا يجددوه كل سنتين لمدة 30 سنة!!!!  
لكن دستور 2014 ألزم الرئيس عشان يعلن الطوارئ  لمدة زمنية ٣ شهور ياخد موافقة مجلس الوزراء وموافقة ٥٠% +1 من اعضاء مجلس النواب… و المدة قابلة للتمديد 3 شهور كمان بس
ولازم موافقة ثلثي مجلس النواب
ومع ان مجلس الوزراء اللي هما سكرتارية السيسي و مجلس النواب بصمجيته اللي معيناهم المخابرات، السيسي ولا عملهم و لا عمل للدستور أي اعتبار!  السيسي اجتمع مع أعضاء مجلس الدفاع يوم الاحد 9 ابريل و اعلن الطوارئ …
لا مجلس الوزراء ولا النواب أجتمعوا ولا اي حاجة و السيسي كان خلاص اعلن حالة الطوارئ و بدأ سريانها من الاحد…. مجلس الوزراء أجتمع يوم الاثنين 10 ابريل و  مجلس النواب( البصمجية )اجتمع يوم الثلاثاء (يعني بعد الاعلان بيومين) و وافقوا على أعلان حالة الطوارئ
المهم رئيس مجلس البصمجية كان له تصريح جميل اوي عالموضوع ده: " مصلحة الدولة تعلو فوق كل الدساتير"!!! والله أعبعال انت بتقول درر
يا مدهول ده انت السلطة التشريعية بتاعة الدساتير والقوانين يخرب بيتك ..
اللي قلناه دلوقتي ده الجانب القانوني من حالة الطوارئ…. تعالى بقى نتكلم عن اثار اعلان حالة الطوارئ و نحلل مع بعض الموضوع
اولا كده:
6. هو احنا فعلا محتاجين طوارئ؟
هل قبل 9 ابريل يعني قبل ما يعلنوا حالة الطوارئ كان المواطن واخد حقوقه و القانون بيطبق؟
و هل فعلا الدستور والقانون كانوا بيقيدوا الشرطة من انها تقبض او تصفي الإرهابيين؟
الواقع ان الفترة اللي فاتت دي كانت أنيل من ال ٣٠ سنة طوارئ بتاعة مبارك….
ده إحنا شوفنا مكالمات متسجلة لمواطنين  وبتتذاع على الهوا وما حدش قال للي بيذيعها انت بتعمل ايه وبرنامج كامل قائم على إذاعة المكالمات المتسربة
شوفنا ناس بيختفوا قسريا أو بيصفوهم و يحطوا في ايدهم رشاشات و يقولوا الشرطة قتلتهم في تبادل اطلاق نار
شوفنا الطفل بتاع تيشرت "لا للتعذيب" اللي اتحبس 588 يوم بدون محاكمة
شوفنا اسلام عطيتو اللي اتخطف وسط الكلية من وسط زمايله وصفوه
أحمد مدحت - طالب كلية الطب اللي اتقبض عليه من بيته و اتصفى و بعدين الداخلية قالت انه انتحر
محمد كمال - اتقبض عليه يوم 3-10-2016 و نشرت الجرايد انه اتقبض عليه - و بعدين اتصفى و قالوا "مقتل محمد كمال في تبادل اطلاق نار" يوم 4-10-2017
مركز النديم وثق من اول حكم السيسي لحد 09-2016
▪ 1083 حالة قتل خارج القانون
▪ 116 حالة تعذيب جماعي
▪ 239 وفاة داخل أماكن الاحتجاز
▪ مصر واخده المركز الأخير عربيا وال 110 من 113 في مؤشر سيادة القانون مفضلش بعدنا غير  أفغانستان وكمبوديا و فينزويلا -
▪ وتوثيق 2811 حالة إختفاء قسري من 07-2013 لحد 07-2016 من "التنسيقية المصرية للحقوق و الحريات"
يعني بعد كل الاحترامات اللي احترمناها للدستور و القانون ليه محتاجين طوارئ؟؟؟  
علشان يبقى التعدي على الحرية الشخصية وعلى الأرواح والممتلكات قانوني ؟!
طيب ليه ؟!
علشان حنقضي عالارهاب؟
7. هل الطوارئ فعلاََ نفعت الشرطة و الجيش في السيطرة عالوضع الامني والقضاء على الإرهاب قبل كده؟
حالة الطوارئ مفروضة على شمال سيناء من أكتوبر 2014 و كل ثلاث شهور بتتجدد ليومنا ده
يعني سيناء تحت حكم الطوارئ اكثر من سنتين و نص كده…
ونقلاََ عن تقرير مركز الأهرام للدراسات السياسية والاستراتيجية (اللي تبع الدولة يعني) -
العمليات المسلحة ضد الجيش و الشرطة زادت بشكل ملحوظ  بعد إعلان حالة الطوارئ…. يعني خلينا نبص عالرسم البياني ده…. قبل مايعلنوا حالة الطوارئ بشهر، يعني في سبتمبر 2014، كان في 17 عملية ارهابية في سيناء….
بص بقى بعد اعلان حالة الطوارئ عالرسم البياني كده…..
مش هانقول ان الزيادة دي بسبب الطوارئ بس مؤكد إن الطوارئ ما منعتش العمليات انها تزيد
بعد كل التجاوزات اللي حصلت في حق أهلنا في سينا باسم الطوارئ الإرهاب زاد ما قلش
عمر ما الاعتقال العشوائي والتصفية والتعدي على حقوق الناس ما هايمنع الإرهاب
ده هو ده غذاء الإرهاب المتكامل علشان يسمن ويربرب وينتشر ويستمر ويستمر

يعني كده هانضحي بالحرية والأمن علشان إيه ؟!
لقمة العيش ؟!
يا صديقي القرش جبان
والمستثمر اللي معاه قرش مش هايحطه في بلد مش مستقرة
ومش بس مش مستقرة ده هو نفسه هايبقى خاضع لقانون الطوارئ وبيتفتش ويتراقب وتتصادر ممتلكاته وكل الكلام الجميل اللي حكينا عنه
وهو عليه من ده بإيه ؟!
يروح يحط القرشين في أي دولة  مستقرة وأمان
والسياحة ..
مين السايح اللي قلبه ميت اللي هاييجي في بلد حكومتها فشلت في السيطرة عليها بالقانون وبتحاول تاخد إجراءات إستثنائية علشان تسيطر
يعني كده  الناس اتكبتت والإرهاب زاد والاقتصاد وقع طيب مين المستفيد ؟
المستفيد الوحيد هو النظام اللي بيحكمنا
أولا قنن كل الجرايم اللي كان بيعملها والتجاوزات في حقوق الإنسان فماحدش يقدر يكلمه من جوة ولا من برة
ثانيا بدل ما هايحيل الناس للقضاء العسكري ويبقى شكله بايخ جاب العساكر للقضاء علشان يشمخوا في الناس براحتهم
ثالثا شكلها حلو خارجيا إنه بيحارب الإرهاب وهاتوا شوية رز علشان تساعدونا في الحرب وgive me baksheesh وكده
رابعا وسط الهيصة دي فرصة انه يعدي بقى كل الاتفاقيات اللي محشورة في ظوره واللي هايتكلم هايتنفخ بالقانون
تيران وصنافير غاز المتوسط يدي سينا لدحلان أي هبد في الزحمة
والخلاصة زي ما قالها عم الحاج بنجامن فرانكلين اللي مرسوم على ورقة ال١٠٠ دولار أم ١٨٠٠ جني ديه
"اي مجتمع يضحي بقليل من الحرية من أجل القليل من الأمان، لا يستحق اياََ منهما و سيخسرهما معاََ"

١٤- سينا .. ريو

سيناء وأهلها.. وأطراف كتير.. سيناريو بنحاول نفك تفاصيله ونحكي عنه..
وبعد ما اتكلمنا عن مناطق كانت مستهدفة زمان..نفس السيناريو بيتكرر في مناطق تانية في سيناء.. ومدن تانية كتير في مصر.
الفيديو ده عن السيناريو والمثال النموذجي الجامع لكل اللي بيحصل في سينا بقاله ٥ سنين

 

فيه أكاديمية في الكيان الصهيوني إسمها interdeciplinary center
ودي أحد أهم الأكاديميات السياسية في الكيان وبتقع في مدينة هرتزليا
قسم الاستراتيجيات والسياسات عندهم يعتبر من أهم ال think tanks في الكيان الصهيوني ودراسات الشرق الأوسط
بيعمل مؤتمر سنوي المعروف باسم مؤتمر هرتزليا من سنة ٢٠٠٠ بيحضر فيه كل العتاولة
ما بين رؤساء  سابقين للولايات المتحدة وغيرها من الدول والأمم المتحدة والكيان نفسه ورؤساء هيئات ومؤسسات دولية
تشوف قايمة المحاضرين فيه دماغك تلف
حاليا بيرأسه عاموس جلعاد الإسم المشهور اللي كان مسئول عن المفاوضات مع حماس للافراج عن شاليط

المهم ان أحد أهم الأفكار اللي طرحت في الثنك تانك ده من ثاني دوراته واتناقشت أكثر من مرة لحد ما تحولت لأحد الاختيارات المطروحة من الكيان كحل للقضية الفلسطينية هي إيجاد وطن بديل للفلسطينيين فين ؟!!

سنة ٢٠٠٢ اقترح وزير البنية التحتية للكيان الصهيوني في المؤتمر  إن سيناء تكون هي الوطن البديل ده
علشان تبقى أرض سينا اللي بلا شعب لشعب بلا أرض

وفي ٢٠٠٣ مستشار الأمن القومي السابق  للكيان الصهيوني Giora Eiland قدم اقتراح بتبادل أراضي بين مصر والكيان الصهيوني
وفي ٢٠٠٤ عرض جيورا الخطة النهائية على المؤتمر
وفي ٢٠٠٨ تمت مناقشة الخطة دي بالتفصيل


وفي ٢٠٠٩ تم عرضها على مبارك زي ما حكى في التسريب اللي سمعناه مع الصحفي
لكن مبارك رفض

الفكرة هي إن إحنا نديهم جزء من سيناء وهم يدونا قده من صحراء النقب + شوية فلوس حلوين كده مع ضم الضفة الغربية للأردن
هم يهجروا لسينا جزء من الفلسطينيين ويفكوا الاحتقان السكاني في غزة وهايبقى لغزة سواحل أكبر وأطول وحقول غاز وشوية موارد لطيفة
واحنا ناخد الأرض دي ونبني عليها مطار دولي والكيان هايسمح بعمل نفق يربط بين مصر والأردن ويبقى كده اتفتح طريق بري مباشر بين مصر والشرق الأوسط من غير الحاجة لدخول الأراضي المحتل
وكله بقى مرضي ومبسوط
إحنا ما خسرناش أرض وبقى عندنا طريق بري كامل ومباشر مع آسيا
وأهل غزة ارتاحوا
والأردن كبر مساحته
والكيان خلص من وجع الدماغ بتاع الغزاوية والقضية الفلسطينية كده اتصفت
ولا بقى توجعوا دماغنا بلاجئين ولا بقدس ولا أي هري من الهري بتاعكم ده ثاني
المناطق اللي اقترحوا ان مصر تتنازل عنها هي:
شريط  ٢٤ كيلومترا على طول شاطئ البحر المتوسط من رفح في الغرب ولحد العريش في عمق سينا
وبطول ٣٠ كم ع الحدود لحد معبر كرم ابو سالم بين مصر والكيان الصهيوني
وناخد إحنا  الجزء ده من صحراء النقب


طبعا الادارات المصرية المتتابعة كانت على علم بالعروض دي
وزي ما قلنا مبارك رفض
لكن كان مسلم سينا لحسين سالم  وحسن راتب حكر خاص بيهم
ومانع أي تمليك لأهالي سينا تخوينا لهم وخوفا من انهم يبيعوا الأرض للصهاينة
طنطاوي لما استلم وبدأت مطاردات الأمن لحسين سالم بعد الثورة
والله احنا كنا غلابة
أصدر قانون رقم ١٤ الخاص بالتنمية المتكاملة لسيناء
وكان فيه نصوص صريحة بمنع التمليك لغير المصريين من أبوين مصريين
ولو مصري مات وحد من عياله غير مصري يبقى لازم يبيع لحد مصري في خلال سنة أو الدولة تشتري منه
غير المصريين لهم بس حق الانتفاع
وكل العمليات سواء التمليك أو الانتفاع أو البيع لا تتم إلا بعد موافقة الجهاز الوطني لتنمية شبه جزيرة سيناء اللي هو تابع للقوات المسلحة
هشام قنديل مع مرسي بعدها حرك القانون ده وأخد قرار بتمليك أهالي سينا والشركات المصرية براس مال مصري كامل في أكتوبر ٢٠١٢
لكن السيسي في ديسمبر ٢٠١٢ بصفته وزير دفاع أخد قرار بحظر التمليك والانتفاع في الأراضي والعقارات بعمق ٥ كم من الحدود الشرقية لمصر اللي هي جزء من خطة جيورا
طيب ما هو بيحاول يحميها يا جدعان أهه
هانشوف
في سبتمبر ٢٠١٤ أذاع الكيان الصهيوني خبر عرض السيسي على أبومازن أرض في سينا بمساحة ٣ أضعاف غزة كوطن بديل وأبومازن رفض
أوشاعة يا عم أوشاعة     
هي الأوشاعة دي اتكررت كثير آخرهم  اليومين دول كان تغريدة لوزير صهيوني إسمه أيوب قرا عن منح وطن بديل للفلسطينيين في سينا بدل الضفة الغربية
نرجع تاني ل ٢٠١٤.. بعد اشاعة ابومازن بشهر واحد في أكتوبر ٢٠١٤ ينتهز السيسي عملية كرم القواديس اللي راح ضحيتها ٣٠ جندي ويصدر قرار بعمل منطقة عازلة على الحدود مع غزة وحكينا عن الموضوع ده قبل كده أكثر من مرة وروابط فيديوهات سيناء السابقة هاتلاقوها في وصف الفيديو
بيسيطر ع الإرهاب يا عم علشان ما يضربش مدنيين .. والا انت عايزه يضرب مدنيين
بعدها بسنة كان خلاص تم الإخلاء ومسح المنطقة دي تماما بأستيكة
في ٢٠١٥ صدر قرار رقم ٩٥ بتعديل قانون ٢٠١٢ اللي كان السيسي معطله علشان يحمي الحدود الشرقية زي ما قلنا
طبعا بقى في وسط الحرب على الإرهاب دي هاينشفها أكثر ويسيطر أكثر ويمنع التمليك خالص
التعديلات نصت على
تمديد حق انتفاع الأجانب من ٥٠ ل ٧٥ سنة
ومنحت رئيس الجمهورية حق منح الأراضي والتعاقدات واستثناء نسبة المصرنة في الشركات الأجنبية لأقل من ٥٥٪
صلاة النبي أحسن

إيه كمان
ضرب حصار على أهل سيناء
هو مش حصار حصار
لكن عكننة وكنا حكينا عنها في فيديو سيناء تتوضأ ومعاناة الأهالي علشان يتحركوا بين مدن سينا وبين سينا وباقي الجمهورية
وإجراءات مشددة على اللي عايز يدخل سيناء من غير المقيمين فيها

الجيش والسيسي والإعلام والشيوخ كانوا بيروجوا إن الإخلاء والتهجير ده لمصلحة أهل سيناء وتفادي قتل المدنيين


يعني نفهم من كده إن الإرهابيين هايتجابوا في شوال وأهل سينا هايبقول في أمان والحياة هاترجع لطبيعتها؟

آه الحمد لله زي ما السيسي قال لرؤساء الأحزاب إننا قضينا على ٩٠٪ من الإرهاب في سينا

واللواء سلامة الجوهري بردو أكد إننا تقريبا خلصنا على ٩٠٪ من الجماعات الإرهابية في سينا
استنى مساعد وزير الداخلية لشمال سينا قال لأم واحد من ضحايا الإرهاب في سينا إنهم قضوا على ٩٦ - ٩٧ ٪


وفيما يبدو إن العساكر من كثر ما هم مش لاقيين إرهابيين بدأوا يضربوا نفسهم في فبراير اللي فات في الشيخ زويد
كمين البوابة قصف كمين المستشفى
لا والناس كانوا مستغربين ان العساكر مش عارفين يحددوا الضرب جاي منين في فيديو تنظيم الدولة الأخير

طيب ماشي
إحنا مصدقين إن السيسي قضى على ٩٧٪ من الإرهاب خلاص
بس يبدو ان ال٣٪ الباقيين نجحوا إنهم يفرضوا سيطرتهم !!
ما شاء الله عاملين كماين دلوقتي على الطريق
والعجيب انها على بعد ٥٠٠ متر من كماين الجيش الثابتة على الشوارع الرئيسية والحيوية
زي الكمين اللي في الفيديو ده .. ٦ مسلحين واقفين عند ميدان اسمه الفواخرية بيفتشوا الناس وبيشوفوا بطايقهم علشان بيدوروا على مسيحيين
واستهداف المتعاونين مع الجيش
لسه يوم ٧ الشهر ده موزعين منشورات تحذر الأهالي من التعاون مع الجيش أو مع جواسيسي الجيش
وحادثة إشعال النار في مواطن بعد خلع عينه وضربه بالرصاص في الشارع في رفح
آخر إحصائية بتقول ان من ٢٠١٣ تم إعدام ٤٠٠ متعاون مع الجيش


فرض سيطرة
في فبراير ٢٠١٧ وقفوا اتوبيس مدرسات في العريش .. ثبتوه بعربية ملاكي ونزلوا نصحوا المدرسات بالاتزام بالزي الشرعي أو إقامة الحد عليهم بالجلد أو ماية النار
هو ال كونك سلفوريك أسيد ده كان مذكور في البخاري والا في مسلم ؟!
راحوا المدرسات بعد كام يوم يستنجدوا بمديرية الأمن مالقيوش حد
راحوا المحافظة وبعد ٦ ساعات قابلهم المحافظ
في الأول كذبهم وطلب شهادة السواقين واحد منهم أنكر إن فيه حاجة والثاني أكد كلامهم
فالمحافظ راح مجيش جيش من المقاتلين الأشداء المجهزين بالعدة والعتاد وقال لك يالله بينا ننزل نلم ال٣٪ الباقيين دول من الشارع ونحمي أرواح نساءنا ونفرض هيبة الدولة على سيناء الحبيبة
حبيبة تبقى بنت أختي (حقيقة علمية)
المحافظ ادالهم يومين أجازة وقرر فتح طريق جديد للأتوبيسات علشان ما يمشوش من شارع الإرهابيين
إرهابيين وآخر الشارع إرهابيين رآخر الشارع
وهم طالعين بقى من عند المحافظ
مسلحين وقفوهم ثاني وكرروا تهديدهم
فوكيل وزارة التعليم اداهم أجازة يومين كمان

فالسيد المحافظ بنفسه تدخل وفتح باب نقلهم لإدارات تعليمية تانية!

هو في تأمين أكتر من كده!!

٢٥ واحد من تنظيم الدولة راحوا على جراج عربيات كير سيرفيس بتاعة النظافة اللي تابعة للجيش ولوعوا فيه
٤٠ عربية و٣ عربيات بتاعة جمع القمامة
فتشوا في البطايق على المسيحيين
وهددوا العمال لو رجعوا يشتغلوا في كير سيرفيس ثاني
ومن ساعتها الزبالة والفيران ماليين شوارع أرض الفيروز

ده غير قصة تهجير الأقباط من العريش .. بعد التهجير الرسمي والمعلن لأهالي رفح والشيخ زويد
بعد ولاية سيناء اللي فيه تهديد للمسيحيين وتصوير قتل ٧ مسيحيين على إيد مسلحين،
هجم ٢ مسلحين يوم ٢٤ فبراير على بيت واحد من الأقباط وقتلوا الإبن والأب وحرقوا البيت وسرقوه في وجود الأم لمدة ساعة إلا ربع في غياب الشرطة اللي أصلا موجودة في كمين دايم على بعد ٤٠٠ متر وما حد اتحرك من الكمين علشان ينقذ الأهالي


وبعده حرقوا شخص تاني..
وواحد دخل عليه المسلحين الدكان بتاعه قتلوه وشربوا عصيو واخدوا بسكويت والكمين جنب المحل ولا الهوا

وقتها انتشر بين الأهالي إن المسلحين عندهم قائمة أسماء المسيحيين المستهدفين فلازم يسيبوا بيوتهم. واتحرك حوالي ١٠٠٠ شخص (حوالي ١١٠ اسر) واللي قدروا يهربوا بيه من العريش لكنيسة الإنجيلية في الإسماعيلية أو السويس .
الحمد لله الجيش سهل لهم الانتقال والسيسي عمل معاش لكل اسرة متضررة ٧٠٠ جنيه بحالهم للأسرة أم نفرين و٨٠٠ لأم ثلاثة أو أكثر


وادى النازحين اجازات
ونقلهم لمدارس القناة
وهو بسرعة اتحرك مع عساكره وظباطه بمنتهى الحسم في القاهرة على البسكلتات بيلعبوا ما شاء الله رياضة
وزارأكاديمية الشرطة وصرح بمنتهى القوة والثبات إن الدولة المصرية خلاااااص استعادت كل هيبتها

يا هيبتك


الفرق بين المتاح لتنظيم الدولة والمتاح للدولة كبير
المسلح بتاع التنظيم هدفه إنه يعمل فوضى فبيقتل ويكسر ويدمر بلا ظابط ولا رابط
لكن المفروض ان الدولة بيبقى هدفها العكس
إستعادة النظام والسيطرة وتطبيق القانون
المسلح بيدعي إن شرعيته واخدها من اللي هو معتقد إنه شرع واختياراته الفقهية اللي هو مفصلها على مقاسه ومؤمن بصحتها
فبيتصرف على أساسها
الدولة شرعيتها من دستور وقانون وتفويض باستخدام العنف في حدودهم والمفروض انها تتصرف على الأساس ده
قايمة الفروق كثير جدا بين المتاح للتنظيم والمتاح الدولة
وبناء عليه ما ينفعش بأي حال من الأحوال الدولة تتصرف زي ما بيتصرف تنظيم الدولة
ما ينفعش تقتل وتروع وتخطف وتهدد إلا في سياق القانون والدستور اللي هي بتستمد شرعيتها منه
الكلام ده يعتبر كلام نظري والوقوف في الصحرا شايل سلاح ومش عارف إمتى وازاي ومنين هايتضرب عليك نار بيخلي الناس تتصرف بشكل عشوائي وغشيم ..
لكن هو تحديدا الفرق بين الجيوش المحترفة المدربة والجيوش الهلاهوءة
إحصائيات  مركز النديم لتأهيل صحايا التعذيب ان عمليات الإعدام خارج نطاق القانون في سيناء وصلت ل ١١٧٧ حالة ..


تعالوا ناخد حالة مميزة شوية ونتكلم عنها بالتفصيل
إيه المميز فيها ؟ حاجتين
أولا إنها حصلت في العريش اللي زي ما كنا حكينا في فيديو سيناء تتوضأ كانت أهدا من رفح والشيخ لكن زحفت عليها المشاكل مؤخرا ..
ثانيا بسبب تركيبة أهل العريش المختلفة عن رفح والشيخ زويد سواء في نسبة التعليم  أو الانفتاح عالسوشيال ميديا والإعلام  الحادثة عملت قلق على المستوى الشعبي

في ٩ يناير تنظيم الدولة هجم على كمين المساعيد وكمين المطافي في العريش وقتل ٧ من الشرطة
في ١٣ يناير الشرطة أخدت بتارهم وقتلت ١٠ متهمين بتفجير الكمين وتهم أخرى
وكالعادة بيقولوا انهم قتلوهم في تبادل اطلاق نار
الشئ الغريب بقى
لا غريب ليه .. ما غريب الا الشيطان
ده هو ده العادي
إن الأسماء اللي أعلنوه عنهم منهم اللي اتقبض عليه في أكتوبر ومنهم اللي اتقبض عليه في نوفمبر ٢٠١٦ يعني من شهرين لثلاث شهور قبل تفجير الكمين
كان فيه ٦ جثث أعلنوا عن أسماءهم و٤ جثث قالوا انهم لمجهولين واتدفنوا من غير ماحد يعرف هم مين.. فالأهالي اللي لهم عيال مختفين قصريا عقلهم طار
واحد من المعتقلين إبنه اتقبض عليه .. راح يسأل عليه في القسم قالوا له مش موجود
وهو خارج شاف عربيته برة
فرح وقال الحمد لله على الأقل موجود عن الحكومة مش مع تنظيم الدولة
وبيقول انه كان عمره ما يتخيل انه هايروح يستلم إبنه جثة من الحكومة

أهالي العريش إجتمعوا في ديوان أو مجلس عيلة إسمها آل أيوب
وخرجوا ب ٨ مطالب
أهمها الافراج عن النعتقلين ومعرفة مصير جثث اللي اتقتلوا وعدم مقابلة وزير الداخلية واستقالة نواب شمال سيناء من مجلس الشعب وفتح ديوان آل أيوب بعد العشاء لأبناء شمال سيناء لحد ما المطالب تتنفذ


نواب شمال سينا قدموا بيان في مجلس الشعب وعبعال قال لهم مش ممكن يكون الكلام ده حقيقي

في ١٩ يناير اتعمل مؤتمر مضاد من شيوخ القبايل اللي لهم مصلحة مع الجيش واللي بعضهم أصلا الجيش هو اللي عينه بيرفضوا فيه مؤتمر آل أيوب
طبعا الطلبات كلها اتسقع لها
لحد ٦ فبراير إجتمعوا الأهالي مرة ثانية وهددوا بالتصعيد وعصيان مدني يبدأ من ١١ فبراير لحد تنفيذ قرارات المؤتمر الأولاني وده كان بعد قرارات جديدة من الجيش لخنق سينا أكثر وأكثر

نواب مجلس الشعب طلبوا مهلة للاستقالة
وفي نفس اليوم الشرطة صفت واحد من الأهالي في بيته قدام ولاده كرسالة لباقي المشاركين في الناس كشت
وتم التفاوض على شوية مطالب هبلة مالهاش علاقة باللي هم كانوا طالبينه
والناس اتكتمت واتكبتت واتخرست
وتنظيم الدولة وزع بيان بيعزي الأهالي وبيتوعد بالثأر والقصاص لولادهم

ده مثال نموذجي جامع لكل اللي بيحصل في سينا بقاله ٥ سنين ومش بس سينا .. في مصر كلها بدرجات متفاوتة
إختفاء قسري واعتقال وبعدين قتل خارج نطاق القانون وتلبيس تهم لأموات تمت تصفيتهم واستعراض انهم بياخدوا بالثأر لقتلى الجيش على جثث تمت تصفيتها ميدانيا
عشان  كده  تسريب سينا الأخير ده ماكانش  مفاجئ وصادم غير للناس اللي مش متابعين اخبار سينا..

ومافيش فرق بين عضو تنظيم بيصفي وجيش نظامي بيصفي غير اليونيفورم..
دولة فشلت في توفير الأمان والخدمات الأساسية لمواطنيها وسايباهم يتمنوا أي حد يحميهم ويديرلهم حياتهم


١٣- العراق..مسافة السكة

شبعونا كلام عن إننا أحسن من سوريا والعراق.. وقبل ما نخلص من المرحلة دي فوجئنا بالريس بلحة بيتكلم عن إننا أحسن من الصومال وأفانستان! قلنا لازم نلحق نفهم اللي حصل وبيحصل في العراق ونعرف احنا فين من العراق.. قبل ما نلاقي نفسنا داخلين عالصومال وأفغانستان!! والحقيقة التطابق مرعب!

١٢- سيناء تتوضأ

من ٢٠١٣ سيادة اللوا أحمد وصفي قائد الجيش الثاني الميداني السابق وعدنا إنه هايسلمنا سينا متوضية من الجماعات المسلحة في ظرف أسبوعين   ..
بعد مرور ثلاث سنوات على وعده (وانتقاله هو لرئاسة هيئة تدريب القوات المسلحة) يا ترى تحقق إيه من وعد سيات اللوا وإمتى سيناء هاتطلع من الميضة؟!!!

Find the last offers by SkyBet at www.bettingy.com BettingY.com Bonuses

تابعونا على الحاجات دى

و إعملوا لايك و شير و سبسكرايب بالذوق

أحدث فيديوهات

Alshakhanah Alshangy

  • ألش خانة | إيران ج٥- الأخيرة
  • ألش خانة ع الهوا | الذكرى السنوية وإعلان هام
  • ألش خانة | ٥ سياسة || الرأسمالية

أحدث فيديوهات

Alsh5anah weekly ألش خانة الأسبوعي

  • ستوديو الألشخانة ٢ - ليه وزنك بيزيد في الصور ! (للمهتمين بالتصوير فقط!!!)
  • ألش خانة | على ما تفرج ٥١- وبعدين ؟
  • ألش خانة | على ما تفرج ٥٠- الأقصى

Built with HTML5 and CSS3 - Copyright © 2015 Alsh5ana