logo new

إسمي علي .. وما فيش داعي لإسم العيلة .. باحاول أوهم نفسي إنهم مش عارفينه ..

مواليد ديسمبر ١٩٨٠

متزوج ولي ٤ بنات .. بالترتيب: جنة - عائشة - حليمة – أمينة

خريج كلية صيدلة من إحدى جامعات مصر العريقة (عريقة من العرق مش من العراقة)

بدأت ماجيستير إدارة أعمال من جامعة ليستر الإنجليزية وتوقفت عند مشروع التخرج عن إدارة الموارد البشرية لعدة أسباب ممكن نتكلم عنهم بعدين.

مقيم خارج مصر من ٢٠٠٥

أخدت جولة طخينة إبتداء من أولى ثانوي (١٩٩٥) بين الجماعات الإسلامية والأفكار المختلفة

ما بين تبليغ ودعوة وإخوان وسلفيين وسلفية جهادية وجماعة إسلامية إستمرت أكثر من ١٢ سنين

أطول فترة قضيتها كانت مع الإخوان

علشان كده لما حد بيقول لي إسمع منهم (أي من الجماعات أو التوجهات الإسلامية) ولا تسمع عنهم باضحك.
 ..

رجعت مصر مع اللي رجعوا في ٢٨ يناير ٢٠١١ خلسة من غير ما حد يعرف غير أم العيال وقعدت مع اللي قعدوا في التحرير لحد يوم ١٢ فبراير وبعدين رجعت لشغلي .. 

أعرف ناس من إتجاهات مختلفة من اللي كانوا بيطلعوا في التليفزيون خلال السنتين اللي بعد الثورة وكنت باحاول أفهم منهم وباحاول أوصل لهم رأيي .. 

وبعدين بدأت موضوع الفيديوهات دي على خفيف وحسب المزاج وحسب توافر الوقت .. وعملنا ٣ فيديوهات خلال فترة سنة تقريبا .. 

ولما الإنقلاب حصل ومذابح الجيش بدأت مات لي في الموضوع ده أكثر من ١٠ ما بين أصدقاء وجيران وأطفال كنت أعرفهم وهم عندهم ٦ سنين بيحفظوا قرآن في المسجد .. ما شفتهمش من يوم ما سافرت .. كبروا واستشهدوا على إيد السفاحين اللي بيحكموا البلد .. ده غير المصابين والمعتقلين 

الحقيقة حسيت بالمسئولية ..

إني برة البلد ومش باعمل حاجة مفيدة وقررت إني أركز في الفيديوهات أكثر وأجلت الماجيستير اللي كنت قربت أخلصه وبدأت أشتغل لوحدي من غير المجموعة اللي بدأنا مع بعض لأن سككهم مختلفة مش نفس سكتي .. 

وبعدين ربنا رزقني بالمجموعة اللي شغالة دلوقتي واحد ورا واحد ..

وحاليا الناس اللي يعتبروا منتظمين في الشغل هم ٤ وأنا خامسهم .. 

سواء المجموعة الموجودة دلوقتي أو الناس اللي عدت علينا ومشيت كلهم بيشتغلوا بدون مقابل .. مش لقلة الفلوس .. 

بالعكس طول الفترة اللي فاتت بييجي لنا عروض نشتغل ويكون فيه عائد مادي ..

سواء نشتغل في قنوات أو نكمل على اليوتيوب بس نشتغل بانتظام ..

والحقيقة هذه العروض أرفضها جميعا (مبارك ستايل) 

لا عايز أعتمد ماديا أو حد يعتمد ماديا على الكلام اللي بنقوله مش بس علشان المصداقية لكن علشان نفضل زي ما احنا .. يتساوى معانا المدح والذم ..

ما نشتغلش أراجوزات ولاentertainers علشان نزود جمهور فيزيد العائد المادي ..

نفضل نقول اللي احنا شايفين انه صح وقت ما احنا نشوف انه مناسب مش اللي الناس عايزة تسمعه وقت ما هم عايزين يسمعوه .. 

أكيد حريص إن أكبر عدد من الناس تسمع اللي بنقوله والمعلومة أو الرأي يوصل لكن مش حريص خالص على إن الكلام ييجي على هواهم أو إنهم يرضوا عن الكلام طالما شايف إنه كلام يرضي ربنا ويريح ضميري .. 

ولما اتعرض علينا من أحد القنوات نعمل حاجة ترضي جميع الأطراف رفضنا 

لأن هدفنا ان كل الأطراف تكون مش راضية وعايزة تغير الواقع الأليم اللي عايشينه

  

بس كده كفاية ولو عندكم أسئلة إخبطوها لنا

Find the last offers by SkyBet at www.bettingy.com BettingY.com Bonuses

تابعونا على الحاجات دى

و إعملوا لايك و شير و سبسكرايب بالذوق

أحدث فيديوهات

Alshakhanah Alshangy

  • ألش خانة | إيران ج٥- الأخيرة
  • ألش خانة ع الهوا | الذكرى السنوية وإعلان هام
  • ألش خانة | ٥ سياسة || الرأسمالية

أحدث فيديوهات

Alsh5anah weekly ألش خانة الأسبوعي

  • ستوديو الألشخانة ٢ - ليه وزنك بيزيد في الصور ! (للمهتمين بالتصوير فقط!!!)
  • ألش خانة | على ما تفرج ٥١- وبعدين ؟
  • ألش خانة | على ما تفرج ٥٠- الأقصى

Built with HTML5 and CSS3 - Copyright © 2015 Alsh5ana